Share Market : सेन्सेक्स 155 अंकांनी कोसळला, गुंतवणूकदारांचे 700000 कोटी बुडाले, सर्वाधिक नुकसान कुणाचं?

भारतीय शेअर बाजारात आज सर्वच क्षेत्रामध्ये घसरण पाहायला मिळाली. सेन्सेक्स 155 अंकांनी घसरला. निफ्टी 50 मध्ये देखील घसरण पाहायला मिळाली.

सर्वाधिक नुकसान स्मॉल कॅप आणि मिड कॅप शेअरमध्ये पाहायला मिळाली. दोन्हीचे निर्देशांक 2 टक्क्यांनी घसरुन बंद झाले. यामुळं गुंतणवूकदारांचे 7 लाख कोटी बुडाले.

सर्वाधिक घसरण रिअल इस्टेट, पॉवर, यूटिलिटी आणि इंडस्ट्रीअल शेअरमध्ये पाहायला मिळाली. अमेरिकेच्या फेडरल रिझर्व्ह बँकेच्या बुधवारी होणाऱ्या बैठकीमुळं आणि भारत पाकिस्तान सीमेवर वाढलेल्या तणावामुळं गुंतवणूकदार सतर्क झाले आहेत.

6 मे 2025 ला बाजार बंद झाला तेव्हा बीएसई सेन्सेक्स 155.77 अंकांनी म्हणजेच 0.19 टक्क्यांनी घसरुन 80641.07 अंकांवर बंद झाला. एनएसईवर निफ्टी 50 निर्देशांक 81.55 अकांनी घसरुन 24379.60 वर बंद झाला.

बीएसईवर लिस्ट असलेल्या कंपन्यांचं बाजारमूल्य 6 मे रोजी कमी होऊन 420.63 लाख कोटींवर आलं. जे सोमवारी 5 मे रोजी 427.48 लाख कोटी रुपये होतं. 6.85 लाख कोटी रुपयांनी बाजारमूल्य घसरलं म्हणजेच गुंतवणूकदारांचे 6.85 लाख कोटी बुडाले.

भारती एअरटेल, टाटा स्टील, महिंद्रा अँड महिंद्रा, हिंदूस्थान यूनिलीवर, नेस्ले इंडियाचे शेअर वधारले. इटर्नल, टाटा मोटर्स, स्टेट बँक ऑफ इंडिया, अदानी पोर्ट्स, एनटीपीसीच्या शेअरमध्ये घसरण झाली. बीएसईवरील 4072 शेअरपैकी 3151 शेअरमध्ये घसरण झाली तर 787 शेअरमध्ये तेजी पाहायला मिळाली. (टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)