Palghar News : पालघरमध्ये विद्यार्थ्यांचा जीवघेणा प्रवास, ग्रामस्थांची प्रशासनाकडे मागणी

पालघर जिल्ह्यातील वाडा तालुक्यात गारगाव, नाकारपाडा आणि जुग्रेपाडा येथील विद्यार्थ्यांना दररोज शाळेत जाण्यासाठी जीवघेणा प्रवास करावा लागत आहे. मुलांना गारगाव येथील आश्रम शाळेत पोहोचण्यासाठी दहा किलोमीटरची पायपीट करावी लागते. या प्रवासात त्यांना वाहत्या पाण्याच्या बंधाऱ्यावरून जीव मुठीत घेऊन जावे लागते, ज्यामुळे त्यांच्या सुरक्षिततेचा प्रश्न निर्माण झाला आहे. ग्रामस्थांनी प्रशासनाकडे आपल्या मुलांच्या सुरक्षिततेसाठी तातडीने उपाययोजना करण्याची मागणी केली आहे. "आमच्या मुलांच्या सुरक्षिततेसाठी बंधाऱ्यावरती पूल बांधा आणि शाळेसाठी एसटी किंवा खाजगी बसची सोय करा," अशी मागणी ग्रामस्थांनी प्रशासनाकडे केली आहे. या मागणीमुळे विद्यार्थ्यांच्या शिक्षणातील अडथळे दूर होऊन त्यांना सुरक्षितपणे शाळेत जाता यावे अशी अपेक्षा व्यक्त केली जात आहे. प्रशासनाने या गंभीर समस्येकडे लक्ष देऊन लवकरात लवकर योग्य तोडगा काढावा अशी अपेक्षा आहे.