रुग्णांना मोफत सुविधांचा करार की पैसे उकळण्याचा? वर्ध्यांत सीटीस्कॅनच्या नावाखाली 3000 उकळले, खुलेआम कमीशन

Wardha: राज्य सरकारकडून आरोग्य सुविधा मोफत मिळत असल्याचा कांगावा केला जात असताना वर्ध्यात जिल्हा सामान्य रुग्णालयाच्या सी टी स्कॅन सुविधेच्या व्यवस्थेने याला छेद दिला आहे.  वर्ध्याच्या जिल्हा सामान्य रुग्णालयात सिटी स्कॅन सुविधेसाठी तीन हजार रुपये घेतले जात असल्याची धक्कादायक बाब पुढे आली आहे. वर्ध्यातील हितेश कोठाडे या रुग्णाला सी टी स्कॅनसाठी 3000 रुपये मोजावे लागले आहे. सी टी स्कॅन सुविधा देणारी एजन्सी आणि आरोग्य विभाग यांच्यात रुग्णांना सुविधा मोफत देण्याचा करार झाला की पैसे उकरण्याचा करार झाला? असाच प्रश्न उपस्थित होत आहे. (Wardha News)

नक्की प्रकरण काय?

हितेश कोठाडे आणि त्यांचा मुलगा रियांश कोठाडे यांच्या गाडीचा टायर फुटल्याने जुनापाणी चौकात अपघात झाला. सुरुवातीला दोघेही शहरातील एका खासगी रुग्णालयात गेले. मात्र डोक्याला गंभीर जखमा असल्याने त्यांना जिल्हा सामान्य रुग्णालयात हलवण्यात आलं. तिथे सीटी स्कॅन करणे गरजेचे असल्याचे सांगत दोघांचे स्कॅन करण्यात आले. पण या सुविधेसाठी रुग्णाकडून तीन हजार रुपये वसूल करण्यात आले आणि विशेष म्हणजे यासाठी कोणतीही पावती देण्यात आलेली नाही. या प्रकारामुळे रुग्णांच्या मनात संशय निर्माण झाला आहे की, जिल्हा रुग्णालयात कुठलं रॅकेट तर सक्रिय नाही ना? सरकारी सुविधा मोफत मिळाव्यात म्हणून करार झालेला असताना रुग्णांकडून पैसे का घेतले जात आहेत, असा सवाल आता विचारला जातोय.

या प्रकरणावरून शिवसेनेचा उबाठा गट आक्रमक झाला आहे. आरोग्य व्यवस्थेत खुलेआम कमिशन घेत कामे केली जात असल्याचा आरोप त्यांनी केला आहे. "आरोग्य मंत्री आणि वर्ध्याचे पालकमंत्री नेमके करतात तरी काय?" असा थेट सवालही उपस्थित करण्यात आला आहे. दरम्यान, राज्यात सध्या आरोग्य व्यवस्थेवर मोठे प्रश्नचिन्ह उभा राहिले असताना वर्ध्यातून हा प्रकार समोर आला आहे. 

हेही वाचा