शोले सिनेमाने बॉलिवूडचा सर्वात मोठा व्हिलन बनवलं, पण पुढे वजन वाढल्यामुळे अमजद खानचं करिअर उध्वस्त झालं

अमिताभ बच्चन, धर्मेंद्र, जया बच्चन, संजीव कुमार आणि हेमा मालिनी यांच्या 'शोले' या चित्रपटात अमजद खान यांनी खलनायकाची भूमिका साकारली होती. ही भूमिका त्यांच्या करिअरमधील अत्यंत महत्त्वाची ठरली आणि यामुळेच त्यांना प्रचंड लोकप्रियता मिळाली. अमजद खान या चित्रपटामुळे रातोरात चर्चेत आले.

या चित्रपटात अमजद खान यांनी 'गब्बर सिंग' ही भूमिका साकारली होती. ही भूमिका हिंदी चित्रपटसृष्टीतील सर्वात लोकप्रिय खलनायकांच्या भूमिकांपैकी एक मानली जाते. प्रौढ कलाकार म्हणून ही त्यांची दुसरीच फिल्म होती. या चित्रपटामुळे त्यांना भरपूर चित्रपटांच्या ऑफर्स मिळाल्या.

त्यांनी ‘मुकद्दर का सिकंदर’, ‘सत्ते पे सत्ता’, ‘चंबल की कसम’, ‘शतरंज के खिलाड़ी’, ‘याराना’ आणि ‘लावारिस’ यांसारख्या अनेक चित्रपटांमध्ये काम केलं. पण त्यांच्या नशिबात काहीतरी वेगळंच लिहिलं होतं.

1976 मध्ये त्यांचा एक गंभीर अपघात झाला होता. या अपघातात त्यांच्या बरगड्या मोडल्या गेल्या आणि फुफ्फुसांवरही परिणाम झाला. त्यामुळे त्यांना तीन महिने अंथरुणावर रहावं लागलं.

या अपघातानंतर त्यांचं वजन वाढायला लागलं. जेव्हा ते या अपघातातून सावरत होते, तेव्हा त्यांच्या पायाला इजा झाली आणि त्यामुळे त्यांना स्थूलपणा जाणवू लागला.

त्यांना Bell's Palsy (बेल्स पाल्सी) देखील झाला होता. त्यामुळे डॉक्टरांनी त्यांना स्टेरॉइड्सवर ठेवले आणि कोणतंही वर्कआउट करण्यास मनाई केली.

त्यांच्या वाढत्या वजनामुळे त्यांची तब्येत हळूहळू खालावत गेली आणि त्यामुळे त्यांच्या हातून अनेक चित्रपट निघून गेले. 1991 पर्यंत अमजद खान यांच्याकडे काम नव्हतं. त्यानंतर त्यांना ‘रामगड के शोले’ या चित्रपटात पुन्हा गब्बर सिंगची भूमिका करावी लागली. 1992 साली त्यांचा मृत्यू झाला. हृदयविकाराच्या झटक्यामुळे त्यांचा अंत झाला. त्यांच्या मृत्यूनंतर काही लहान-मोठ्या फिल्म्स प्रदर्शित झाल्या.