Asim Munir : इकडं पाकिस्तानचे परराष्ट्र मंत्री चीनमध्ये अन् तिकडं पाकिस्तान सरकारचं लष्कर प्रमुखांना मोठं गिफ्ट; तब्बल 65 वर्षात पहिल्यांदाच निर्णय!

Asim Munir : पाकिस्तानचे परराष्ट्र मंत्री इशाक दार यांनी मंगळवारी बीजिंगमध्ये चीनचे परराष्ट्र मंत्री वांग यी यांची भेट घेतली. डॉन न्यूजच्या वृत्तानुसार, चीनने (China said supports to Pakistan in defending its sovereignty and integrity) मंगळवारी सांगितले की ते पाकिस्तानला त्यांच्या सार्वभौमत्वाचे आणि अखंडतेचे रक्षण करण्यासाठी पाठिंबा देतात. वांग यी म्हणाले की चीन भारत आणि पाकिस्तानमधील वाद संवादाद्वारे सोडवण्याच्या पुढाकाराचे स्वागत करतो. वांग यांनी पाकिस्तानला त्यांचा मजबूत मित्र म्हणून वर्णन केले. दार यांनी पाकिस्तानला पाठिंबा दिल्याबद्दल वांग यांचे आभार मानले. दरम्यान, पाकिस्तानमध्ये लष्करप्रमुख असीम मुनीर यांना (Pakistan Army Chief Asim Munir) फील्ड मार्शल (Field Marshal) म्हणून बढती देण्यात आली आहे. जिओ न्यूजच्या वृत्तानुसार, पंतप्रधान शाहबाज शरीफ यांच्या मंत्रिमंडळाने मंगळवारी हा निर्णय घेतला. भारताविरुद्ध ऑपरेशन बन्यान-उम-मारसूस दरम्यान सैन्याचे नेतृत्व केल्याबद्दल मुनीर यांना बढती देण्यात आली. पाकिस्तानमध्ये असीम मुनीर यांच्यापूर्वी, 1959 मध्ये, लष्करी हुकूमशहा अयुब खान यांनी स्वतःला फील्ड मार्शल घोषित केले होते.

फील्ड मार्शलचा रँक तिन्ही दलात सर्वोच्च

फील्ड मार्शल हा पाकिस्तानी सैन्यातील सर्वोच्च लष्करी पद आहे, जे फाईव्ह स्टार रँक मानले जाते. हा रँक जनरल (चार स्टार) वर आहे. पाकिस्तानमध्ये, फील्ड मार्शलचा रँक हा लष्कर, नौदल आणि हवाई दलात सर्वोच्च आहे.

पाकिस्तान आपलं शिष्टमंडळ अमेरिका, ब्रिटनला पाठवणार 

भारताने जगातील प्रमुख देशांमध्ये आपले शिष्टमंडळ पाठवण्याच्या निर्णयानंतर, आता पाकिस्तानचे पंतप्रधान शाहबाज शरीफ यांनीही जगातील प्रमुख देशांमध्ये आपले शिष्टमंडळ पाठवण्याचा निर्णय घेतला आहे. रेडिओ पाकिस्तानच्या वृत्तानुसार, बिलावल भुट्टो या उच्चस्तरीय पथकाचे नेतृत्व करतील. भारत-पाकिस्तान युद्धबंदीनंतर हा निर्णय घेण्यात आला आहे. या पथकात 7 नेते आहेत. यामध्ये ऊर्जा मंत्री मुसादिक मलिक, पाकिस्तान मुस्लिम लीग-नवाज नेते खुर्रम दस्तगीर खान, सिनेटर शेरी रहमान, माजी परराष्ट्र मंत्री हिना रब्बानी खार, मुत्ताहिदा कौमी मूव्हमेंटचे खासदार फैसल सब्जवारी आणि माजी परराष्ट्र सचिव तेहमीना जंजुआ आणि जलील अब्बास जिलानी यांचा समावेश आहे.

पाकिस्तानचे उपपंतप्रधान आणि परराष्ट्र मंत्री इशाक दार यांनी सांगितले की, ही पथक लवकरच अमेरिका, ब्रिटन, ब्रुसेल्स, फ्रान्स आणि रशियाला भेट देईल.

शाहबाज शरीफ यांनी केलं ट्रम्प यांचे कौतुक 

दरम्यान, पाकिस्तानचे पंतप्रधान शाहबाज शरीफ यांनी काश्मीर मुद्दा उपस्थित केल्याबद्दल अमेरिकेचे अध्यक्ष डोनाल्ड ट्रम्प यांचे कौतुक केले. 11 मे रोजी ट्रम्प म्हणाले होते की, 'हजार वर्षांनंतर' काश्मीर प्रश्नावर तोडगा निघू शकतो का हे पाहण्यासाठी मी दोघांसोबत काम करण्याचा प्रयत्न करेन.' सोमवारी कराचीतील नौदल डॉकयार्डला शाहबाज यांनी भेट दिली. त्यांनी सैनिकांनाही संबोधित केले. यादरम्यान शाहबाज यांनी नौदलाचे कौतुक केले आणि सांगितले की, भारतीय नौदलाचे विमानवाहू जहाज विक्रांत पाकिस्तानच्या 400 नॉटिकल मैल जवळ पोहोचले होते. परंतु पाकिस्तानच्या लष्कर आणि हवाई दलाकडून मोठ्या प्रमाणात नुकसान सहन केल्यानंतर, नौदलाची तयारी लक्षात आल्यानंतर विक्रांत मागे हटला. शाहबाज यांनी सांगितले की जर युद्धबंदीचे उल्लंघन झाले तर भारताला कठोर प्रत्युत्तर दिले जाईल.

इतर महत्वाच्या बातम्या 

• ऑपरेशन सिंदूरमध्ये बेचिराख झालेल्या 'त्या' चिनी मिसाईलच्या अवशेषांची 'डिमांड' अशीही वाढली! अमेरिका, जपानसह भारताकडे तब्बल 7 देशांची मागणी, प्रकरण आहे तरी काय?