माहेरी आलेल्या लेकीवर काळाचा घाला, स्लॅब कोसळून दोन वर्षांची चिमुकली ठार; आईने फोडला हंबरडा

ठाणे : कल्याणच्या चिकणीपाडा परिसरातील सप्तशृंगी इमारतीच्या दुर्घटनेनं अनेक कुटुबांवर दु:खाचा डोंगर कोसळला आहे. या दुर्घटनेत 6 जणांचा मृत्यू झाला असून दोन वर्षांच्या चिमुकलीनेही आपला जीव गमावला आहे. या घटनेनं सर्वत्र हळहळ व्यक्त होत असून एक दिवस अगोदरच ती चिमुकली तिच्या आईसह मामाच्या गावी आली होती. मात्र, तोच एक दिवस काळ बनून जीवावर उठला. नमस्वी शेलार असे या मृत मुलीचे नाव आहे. अग्निशमन दलाच्या (Fire birgade) जवानांनी इमारतीच्या कोसळलेल्या ढिगाऱ्याखालून या चिमुकलीचा मृतदेह बाहेर काढल्यानंतर येथील उपस्थितांचे डोळे पाणावले होते. तर, आपल्या चिमुकलीचा मृतदेह हाती घेऊन आईने हंबरडा फोडला, हे काळीज पिळवटून टाकणारे दृश्य पाहून अनेकांच्या काळजाचं पाणी पाणी झालं. 

सप्तशृंगी इमारतीच्या तळमजल्यावर जयश्री गुजर घरात किचनमध्ये काम करत होत्या. याच दरम्यान दुपारच्या सुमारास चौथ्या मजल्यावरील स्लॅब कोसळला. मोठ्ठा आवाज झाल्याने जयश्री बाहेर आल्या तर भला मोठा स्लॅब कोसळल्याचं पाहायला मिळालं. त्यानंतर, काही क्षणातच सगळीकडे मोठी धूळ पसरली. या धक्क्यातून सावरतेच तोच आपली आजी,आत्या, 4 वर्षांचा भाचा, दोन वर्षांची भाची ढीगाऱ्याखाली असल्याचे जयश्रीच्या लक्षात आले. आजूबाजूच्या नागरिकांनी लगेचच धाव घेत जखमींना बाहेर काढण्याचे काम सुरू केलं. याच दरम्यान अग्निशमन विभागाने घटनास्थळी धाव घेत बचाव कार्य सुरू केलं. या दुर्घटनेत जयश्री बचावली तरी तिची आजी सुशीला शेलार, दीड वर्षाची भाची नमस्वी शेलार यांचा मृत्यू झाला. तर, तिची आत्या अरुणा विरणारायन आणि भाचा श्रविल शेलार जखमी असून त्यांच्यावर उपचार सुरू आहेत. 

आईच्या भेटीसाठी आली होती लेक

लेक आईला भेटण्यासाठी नाशिकच्या सिन्नरवरून कल्याणला घटनेच्या एक दिवस अगोदर आली होती. दुसऱ्या दिवशी दुपारी जेवणाची तयारी सुरू होती, नात जयश्री किचनमध्ये जेवणाचे नियोजन करत होती, तर हॉलमध्ये माय-लेकीच्या गप्पा मारत होत्या. चिमुकलं लहान मुलं दुपारच्या झोपेत होतं, त्यातच अचानक मोठा आवाज झाला आणि डोळ्यासमोर होत्याच नव्हतं झालं. या दुर्घटनेत झोपेत असलेली लहान मुलगी ढिगाऱ्यात अडकून पडली, बचाव कार्यादरम्यान दोघांना वाचवण्यात यश आले पण दोन वर्षांच्या चिमुकलीचे झोपेत असतानाच तिचे निधन झाले. 

Building Collapse: कल्याण इमारत दुर्घटनेतील मृतांची नावे खालीलप्रमाणे

प्रमिला साहू (वय 58)
नामस्वी शेलार (वय दीड वर्षे)
सुनीता साहू (वय 37) 
सुजाता पाडी (वय 32)
सुशीला गुजर (वय 78)
व्यंकट चव्हाण (वय 42) 

जखमींची नावे

अरुणा रोहिदास गिरणारायन (वय 48)
शरवील श्रीकांत शेलार (वय 4)
विनायक मनोज पाधी (वय साडेचार वर्षे)

हेही वाचा

केवळ 20 हजारांच्या कर्जासाठी शेतकऱ्यानं संपवलं जीवन; सोयायटी सचिवाचं तलाठ्याला पत्र