Pune : पुणेकरांसाठी मोठी बातमी! सोमवारपासून शहरात रोटेशन पद्धतीने पाणी कपात होणार

पुणे : पुणेकरांसाठी एक महत्त्वाची बातमी असून उन्हाळा असेपर्यंत पाणी जपून वापरावे लागणार आहे. सोमवारपासून (5 मे) पुण्यातील काही भागात रोटेशन पद्धतीने पाणी कपात (Pune Water Supply) होणार आहे. दक्षिण पुण्यात हे पाणी कपात होणार आहे. वडगाव जलशुद्धीकरण प्रकल्पातून पाणी पुरवठा होणाऱ्या भागात रोटेशन पद्धतीने पाणी कपात होणार आहे. वाढत्या उष्णतेमुळे पुणे शहरातील उपनगरात पाण्याची मागणी वाढली आहे. त्यामुळे महापालिकेने हा निर्णय घेतला आहे. 

Pune Water Supply News : पुण्यातील कोणत्या भागात पाणी कपात होणार? 

पुण्यातील सिंहगड रस्ता भाग, सहकारनगर, धनकवडी, बालाजी नगर, आंबेगाव पठार, दत्तनगर, संतोषनगर, कात्रज, भारती विद्यापीठ परीसर, कोंढवा बुद्रुक या भागात सोमवारपासून पाणी कपात होणार आहे. 

पुण्यात पाणी कपातीचे कारण काय?

वडगाव जलशुद्धीकरण प्रकल्पाची क्षमता 250 एम.एल.डी. असून सद्यस्थितीत 243 एम.एल.डी. पाणीपुरवठा करण्यात येतो. या व्यतिरिक्त नवीन समाविष्ठ आंबेगाव बु. व खुर्द परिसरात 15 एम.एल.डी. पाणीपुरवठा होतो. तसेच टँकर सुमारे 5 एम.एल.डी. व तळजाई वनक्षेत्रा मध्ये 5 एम.एल.डी. याप्रमाणे एकूण 25 एम.एल.डी. अतिरिक्त पाणीपुरवठा होतो. 

त्यामुळे सुमारे 25 एम.एल.डी. पाणीपुरवठा  कमतरता असल्याने या व्यतिरिक्त पाण्याचा विचार करिता वडगाव जलशुद्धीकरण प्रकल्पाची क्षमता अपुरी  पडत आहे. उन्हाळा कालावधी मधील वाढत्या पाणीपुरवठा मागणीच्या पार्श्वभूमीवर उपलब्ध पाणीसाठा अपुरा असल्याने धायरी, सनसिटी, वडगाव बु., हिंगणे, सहकारनगर, धनकवडी, बालाजीनगर, आंबेगावपठार, दत्त नगर, संतोषनगर, भारती विद्यापीठ परिसर, आगम मंदिर, कात्रज, कोंढवा बु. परिसरास विभागवार पद्धतीने झोन निहाय एक दिवस पाणीपुरवठा बंद करून पाणी वितरीत करण्यासाठी हा निर्णय महापालिकेने घेतला आहे.