Murud-Janjira Fort: मुरुड-जंजिऱ्यावर पर्यटकांच्या सुरक्षेचा प्रश्न; लाईफ जॅकेट नाही, क्षमतेपेक्षा जास्त प्रवासी, अपघाताला आमंत्रण

Murud-Janjira Fort: मुरुड-जंजिरा किल्ल्यावर पर्यटकांची वाढती गर्दी आणि प्रशासनाचा ढिसाळ कारभार पुन्हा एकदा समोर आला आहे. उन्हाळ्याच्या सुट्ट्यांमध्ये गड पाहण्यासाठी आलेल्या नागरिकांच्या सुरक्षेचा पूर्णपणे विचारच केला जात नाही. समुद्रातून गडावर नेण्यासाठी बोटी सोडल्या जात आहेत. मात्र, या बोटीमध्ये क्षमतेपेक्षा अनेक पट जास्त प्रवासी घेतले जात आहेत. आणखी गंभीर बाब म्हणजे या प्रवाशांना लाईफ जॅकेट घालण्याची कोणतीही सक्ती नाही. अनेक बोटींमध्ये तर लाईफ जॅकेटचा पत्ताच नाही. यापूर्वीही अशाच प्रकारे बोटी उलटण्याच्या घटना घडल्या असून काहींना जीव गमवावा लागला आहे. तरीही प्रशासन आणि बोट चालकांकडून कोणीही धडा घेतलेला दिसत नाही. पर्यटकांचा जीव धोक्यात घालून बेकायदेशीर पद्धतीने बोटी चालवल्या जात आहेत.