Buldhana News : केस गळती, नख गळतीनंतर आता बुलढाण्यात हाताला भेगा पडण्याचा प्रकार? आरोग्य विभाग अलर्ट मोडवर
Buldhana News : बुलढाणा जिल्ह्यातील नागरिकांनी चालू वर्षात अचानकपणे केस गळणे, टक्कल पडणे आणि बोटांची नखे गळून जाणे अशा गूढ आजारांचा अनुभव घेतला आहे
Buldhana News : बुलढाणा जिल्ह्यातील नागरिकांनी चालू वर्षात अचानकपणे केस गळणे, टक्कल पडणे आणि बोटांची नखे गळून जाणे अशा गूढ आजारांचा अनुभव घेतला आहे. खामगाव व शेगाव तालुक्यांमध्ये सुरू झालेला हा आजार आता चिखली व मेहकरसारख्या घाटमाथ्याच्या भागातही पसरला आहे. या प्रकारांना अनेक महिने उलटले असतानाही भारतीय वैद्यकीय संशोधन संस्थेचा अहवाल अजूनही लालफीतशाहीत अडकलेला आहे. त्यातच आता मेहकर तालुक्यात हाताला भेगा पडण्याच्या आजाराची चर्चा सुरू झाली आहे. विशेषतः मेहकर तालुक्यातील शेलगाव देशमुख गावातील 20 गावकऱ्यांनी हाताला खोल भेगा पडत असल्याच्या तक्रारी आरोग्य विभागाकडे नोंदवल्या आहेत.
हा प्रकार केंद्रीय आरोग्य आणि आयुष राज्यमंत्री प्रतापराव जाधव यांच्या गृह मतदारसंघातील गावात उघडकीस आल्याने आरोग्य विभागाने याची गंभीर दखल घेतली आहे. जिल्हा परिषदेच्या आरोग्य विभागाचे विशेष पथक शेलगाव देशमुख येथे दाखल झाले. आरोग्य विभागाच्या विशेष पथकाने गावातील बाधित नागरिकांची सखोल वैद्यकीय तपासणी केली.
नेमका आजार कोणता आहे?
पथकाने केलेल्या तपासणीत एकूण 20 रुग्णांची पाहणी करण्यात आली. यातील बहुतांश रुग्णांना इसबगोल (एक्झेमा, पाल्मोप्लांटर केराटोडर्मा किंवा पाल्मोप्लांटर सोरायसिस) या त्वचाविकाराचे लक्षणे आढळून आली आहेत. हे रुग्ण मागील 12 महिने ते 5 वर्षांपासून या आजाराने त्रस्त असल्याचे निदर्शनास आले आहे. या रुग्णांवर मागील 1 ते 2 वर्षांपासून बुलढाणा व अकोला येथील त्वचारोग तज्ज्ञांकडून उपचार सुरू असल्याचेही तपासणीतून निष्पन्न झाले आहे. हा आजार संसर्गजन्य नसून पाण्याशी याचा काहीही संबंध नाही, वेगवेगळ्या प्रतिजन किंवा हानिकारक रसायनांच्या संपर्कात आल्यास, शरीराच्या स्वयंप्रतिकारक प्रणालीद्वारे (Autoimmune response) हा विकार उद्भवतो. तसेच, सर्व रुग्णांना आणि स्थानिक आरोग्य कर्मचाऱ्यांना या आजाराची माहिती, योग्य उपचार पद्धती व घ्यावयाची काळजी याबाबत सविस्तर मार्गदर्शन करण्यात आल्याची माहिती डॉक्टरांनी दिली आहे.
दरम्यान, गेल्या डिसेंबर महिन्यापासून बुलढाणा जिल्ह्यातील शेगाव, नांदुरा, खामगाव तालुक्यातील अनेक गावात अचानक केस गळतीने नागरिक हैराण झाले होते. केस गळतीनंतर रुग्णांची नखे अचानक विद्रूप होऊन नखे कमजोर होऊ लागली होती. अनेकांची नखे गळून पडली असल्याचं धक्कादायक वास्तव समोर आलं होतं. त्यानंतर रुग्णांना प्रचंड थकवा व चिडखोरपणा जाणवू लागला होता. या सर्व प्रकारानंतर आयसीएमआरच्या पथकाने या भागाचा दौरा करून अनेक नमुनेही तपासणीसाठी घेतले होते. मात्र याबाबतचा अहवाल अजूनही लालफीतशाहीत अडकलेला आहे.
आणखी वाचा
महत्त्वाच्या बातम्या
ट्रेंडिंग न्यूज
