Pune Crime : शिंदेंच्या शिवसेना जिल्हाध्यक्षाने पुतण्या-पुतणीवर बंदुक रोखली, आमदार विजय शिवतारेंच्या भाचीकडून गुन्हा दाखल
Pune Crime : एका लग्नाच्या कार्यक्रमात दोन कुटुंबातील वाद हा हाणामारीपर्यंत गेला. यावेळी शिंदेंच्या पुणे जिल्हाध्यक्षाने त्यांच्याच पुतण्या-पुतणीला जीवे मारण्याची धमकी दिली.
पुणे : शिवसेना शिंदे गटाचे जिल्हाध्यक्ष दिलीप यादव यांनी लग्न सोहळ्यात आपल्याच पुतण्या आणि पुतणीवर पिस्टल रोखून धमकावल्या प्रकरणी गुन्हा दाखल झाला आहे. सासवड पोलिस स्टेशनमध्ये आमदार विजय शिवतारे यांची भाची केतकी धनंजय झेंडे यांनी या प्रकरणी फिर्याद दाखल केली आहे. दिलीप यादव हे आमदार विजय शिवतारे यांचे चुलत मेव्हणे आहेत. तर फिर्यादी केतकी धनंजय झेंडे या शिवतारे यांच्या सख्ख्या भाची आहेत. कुटुंबातील जुना वाद असा चव्हाट्यावर आल्याने चर्चेला उधाण आलं आहे.
सासवड पोलीस स्टेशनमध्ये दाखल फिर्यादीनुसार, शनिवारी सासवड-हडपसर रोडवरील महाराजा लॉन्समध्ये फिर्यादी झेंडे यांचे चुलत भावाचा साखरपुडा होता. त्या कार्यक्रमाला केतकी झेंडे या सहकुटुंब हजर होते. याच कार्यक्रमात विनय यादव, दिलिप यादव, सुनिता यादव, शुभांगी दौंडकर, अक्षता यादव, भुजंग यादव, महेश यादव उपस्थित होते.
फिर्यादी केतकी झेंडे यांचे चुलत भाऊ चिनू उर्फ संकेत यादव हा झेंडे यांच्या परिवारातील सदस्यांना खिजविण्याच्या हेतूने जवळ आला. 'तुम्ही शनिवारी माझ्या लग्नाला दिलीप यादव यांचे कारण देऊन आला नाहीत. मग आज या साखरपुड्यात कार्यक्रमाला कसे काय आले?' असा प्रश्न त्याने केला.
यावरून झेंडे यांचे दोन्ही भाऊ आणि चुलत भाऊ यांची चिनू यादव याच्याशी किरकोळ बाचाबाची झाली. त्यावेळी चुलत भाऊ चिनू हा या कुटुंबातील सदस्यांपासून निघून गेला. पुढे चिनू हा दिलीप यादव यांच्या कुंटुबीयांच्या घोळक्यात गेला. त्यानंतर काही मिनिटात दिलीप यादव, विनय यादव, सुनिता यादव, शुभांगी दौंडकर, अक्षता यादव, भुजंग यादव, महेश यादव आणि इतर काहीजण झेंडे यांच्या भावांच्या अंगावर धावून आले.
यातील अक्षता यादव, सुनिता यादव, शुभांगी दौंडकर यांनी दोन्ही भावांच्या अंगावर जाऊन त्यांना मारहाण केली. यामध्ये दोन्ही भावांना वळ येईपर्यंत मारहाण करण्यात आली. तसेच या प्रसंगी केतकी धनंजय झेंडे मधे पडल्या असता दिलीप यादव आणि विनय यादव यांनी त्यांना जोरात ढकलून दिले. या ढकला ढकलीत झेंडे यांच्या गळ्यातील टेम्पल हार, अंदाजे 3.30 ग्रॅम वजनाचा हार गहाळ झाला.
याच दरम्यान दिलीप आणि विनय यादव यांनी कंबरेचं पिस्टल काढून झेंडे आणि त्यांच्या भावांच्या अंगावर ताणून त्यांना जिवे मारण्याची धमकी दिली. पुन्हा सासवड मध्ये दिसलात तर बघा अशी धमकी दिलेली. तसेच या आधी देखील यादववाडी येथे झेंडे यांचे भाऊ प्रसाद यादव व सागर यादव गेले असता विनय व दिलिप यादव यांनी त्यांचेकडील पिस्टल ऊगारुन जिवे मारणेची धमकी दिलेली होती.
त्या अनुषंगाने त्यावेळी सासवड पोलिस स्टेशन येथे अदखलपात्र गुन्हा देखल करण्यात आला होता. शनिवारी सासवड हडपसर रोडवरील महाराजा लॉन्स मध्ये दिलीप सोपान यादव आणि केतकी धनंजय झंडे यांच्या कुटुंबातील सदस्यांमध्ये झालेल्या वादाची फिर्याद केतकी झेंडे यांनी दाखल केली. दिलीप यादव यांनीही तीन जणांच्या विरोधात फिर्याद दाखल केली आहे.
ही बातमी वाचा:
महत्त्वाच्या बातम्या
ट्रेंडिंग न्यूज
